أضيف في 7 فبراير 2021 الساعة 21:27


قصّة من زمن تجارة العزّ والمعقول!!



بقلم - الطيب آيت أباه من تمارة

واحد العام باقِي تانعقل تزّادت التّحميرة -الفلفلة الحمراء- زيادة صاروخية، بما يقارب 100%، وكان تايبان عندي واحد العطار متجول، تزامنا مع أيّ زيادة كاتطرَى فشي مادة من المواد اللي تانبيع، وأنا كنت دائما تانظّاهر بأنني ما عندي علم بموضوع الزيادة، غير باش يبقى دائما هاذ صاحبنا وأمثالو، تايعتاقدو أنهم شمتوني، بينما في الحقيقة، أنا تاندير هاد المسرحية، باش يبقاو كلما تزاد شي برودوي في السوق، يسارعو بإخباري. لأنني في آخر المطاف ماتانعطيهومش داكشي اللي طلبو، بل تانعطيهوم داكشي اللي بغيت أنا، جزاءا لهم على إخباري، بلا ما يكتاشفو أنني تانوظّفهوم كأعين ديالي في السوق.

المُهمّ هاد العطار صاحبنا، كان جَا عندي من قبل، وشاف عندي التحميرة مصطوكيا في لاكاب، ولهذا جاب معاه الهوندا. يعني جاي معووّل يگـريسيني تجاريا عاين باين. ولكن أنا ما ساهلش ليه، حيث غير سووّلني على ثمن التحميرة، وقلت ليه ثمنها الأصلي دون زيادة، وهوّ يجبد الفلوس زرباً خفّاً، وقال لي عطيني 500 كيلو. ولكن قمعتو غي بالفن، حيث استأذنت منّو نسووّل مولاها اللي باقي گاع ماخلّصتو فيها. وفعلا كان واحد التاجر "ملالي" الله يذكرو بخير هوّ اللي جابها لي، وصراحة باقي ماخلصتهاش ليه، ولكن بالثمن الأول المتقف عليه أيام تجارة العز والكلمة.

فعلا هزّيت قدّامو الهاتف، وتّاصلت بصديقي الملالي، وهوّ يعطيني الثمن الجديد أمام صدمة العطار المتجول. ومع ذلك ما خلّيتوش بلاش، غير هوّ ما خداش داكشي اللي كان عووّال عليه ياخدو. لأنّ اللي مفروض فيهوم يشركو معايا هاذ البركة، هوما الزبناء الأوفياء والمخلصين، اللي ديما معايا في السراء والضراء، ماشي المضاربين اللي كايستاغلو الزيادات لصالحهوم الشخصي فقط.

خُلاصة القول أنّ التجارة علم وشطارة، والشّمايتِييّا اللي تايدُورو في السوق باش يشمتوك، وايّاك تخسر معاهوم، بل بالعكس لوح ليهوم ديما شي عظييّم يتلاهاوْ بيه، في مقابل أنهم يجيبُو ليك الأخبار د السوق اللي مازالَة في الميكّة. وحتّى الزيادة حيث تطرَى على شي برودوي، ما تاكلوهاش بوحدك، بل اعطي منها للكليان ديالك، باش كولشي يتمعّش، وتحافظ أنت على علاقات زوينة مع زبناءك، وتكسب قلوب الناس، وربي يطرح ليك البركة في تجارتك.. هاكّا كانت القاعدة باش كنّا خدّامين أيام كانت العملة الرائجة بشكل كبير هي النية والمعقول.

اليوم بزّاف ذيال الحوايج تبدّلو، وبنادم رجعات كرشو كبيرة، وباغي ياكل غا بوحدو، وكثارو المخربقين والخرمازا، واصبح الغش مرادف للذكاء والفطنة، واللي خدّام بالمعقول، تايبان بحال شي كانْبُو، لا يَلوِي على شيء. لذلك البَركة انعادمات، ومشات مع مّاليها اللّوَالَى.. الله يتمّ ما بقَى على خير..

الطيب آيت أباه (#مول_الحانوت)




 

أضف تعليقك على الخبر
* كاتب التعليق
* عنوان التعليق
  * الدولة
* التعليق



مرحلة المراهقة

الأمازيغية وسيناريوهات ما بعد الدستور الجديد

المراة في الاساطير الامازيغية بالاطلس الصغير

الموظفون الأشباح

نصيب الصحراء من كعكة وثائق "ويكيليكس"

نسبة كبيرة من العاطلين عن العمل يفتقدون تقدير ذواتهم ويشعرون بالفشل ويواجهون إعاقات نفسية

رد : دولة المخزن ليست

مهرجان تفاوين في مهب التساؤلات

الإنسان ومبادئ الحياة السامية

عفريت الحرية .... خريج بلا وظيفة